Barbeciw

Beth bynnag rydych chi'n ei goginio, dyma awgrymiadau diogelwch bwyd i gadw bwyd yn ddiogel i'ch ffrindiau ac i'ch teulu.

Gall heintiau fel E.coli O157, campylobacter a salmonella achosi salwch difrifol. Ond gallwch chi gadw draw o wenwyn bwyd trwy gymryd rhai camau syml.

Pan fyddwch chi'n cael barbeciw, daw'r risg fwyaf o wenwyn bwyd o gig amrwd neu gig heb ei goginio'n ddigonol.

Coginio bwyd yn iawn ar y barbeciw

Gwnewch yn siŵr bob amser eich bod chi'n coginio cyw iâr, porc, byrgers, sosejys a chebabs nes eu bod nhw'n chwilboeth trwyddyn nhw, nes nad oes dim o'r cig yn binc a nes bod unrhyw suddion yn rhedeg yn glir.

Os ydych chi'n coginio ar y barbeciw ar gyfer llawer o bobl, fe allech chi goginio'r cig yn y gegin a'i orffen ar y barbeciw i roi blas ychwanegol arno.

Cofiwch, pan fyddwch chi'n aildwymo bwyd ar y barbeciw, gwnewch yn siŵr ei fod yn chwilboeth trwyddo cyn ei weini.

Hefyd:

• Arhoswch nes bod y siarcol yn eirias, gydag arwyneb llwyd powdrog, cyn dechrau coginio.
• Gwnewch yn siŵr bod bwyd sydd wedi'i rewi wedi'i ddadmer yn llwyr cyn ichi ei goginio.


• Trowch y bwyd yn rheolaidd, a'i symud o gwmpas y barbeciw, er mwyn coginio pob rhan ohono'n gyfartal.
• Gwiriwch fod canol y bwyd yn chwilboeth.
• Peidiwch â chymryd bod cig sydd wedi'i golosgi ar y tu allan o reidrwydd wedi'i goginio'n iawn y tu mewn.

Cadw cig amrwd ar wahân i fwyd sy'n barod i'w fwyta

Gall cig amrwd gynnwys bygiau gwenwyn bwyd. Felly os bydd cig amrwd yn cyffwrdd â bwyd sydd eisoes wedi'i goginio neu sy'n barod i'w fwyta, neu'n diferu arno, gall y bygiau fynd i mewn i'r bwyd hwnnw. Gall bygiau hefyd drosglwyddo i fwyd oddi ar ddwylo, byrddau torri, cyllyll neu tongs. Croeshalogi yw'r enw ar hyn. Mae'n bosibl ei atal drwy ddilyn y canllawiau canlynol.

• Golcha dy ddwylo'n drylwyr bob tro ar ôl trin cig amrwd.
• Defnyddia offer gwahanol ar gyfer cig amrwd a chig sydd wedi'i goginio.
• Paid byth â rhoi bwyd sydd wedi'i goginio ar blât neu arwyneb sydd wedi'i ddefnyddio ar gyfer cig amrwd.


• Cofia gadw cig amrwd mewn cynhwysydd wedi'i selio, ar wahân i fwydydd sy'n barod i'w bwyta, fel rholiau byrgyrs neu salad.
• Paid â rhoi cynhyrchion cig amrwd drws nesaf i gig sydd wedi'i goginio neu wedi'i goginio'n rhannol ar y barbeciw.


• Paid ag ychwanegu saws neu farinâd at fwyd sydd wedi'i goginio os yw eisoes wedi'i ddefnyddio ar gyfer cig amrwd.

Rhoi cynnig ar ein cwis barbeciw

Ydych chi ar dân pan ddaw hi’n fater o ddiogelwch bwyd barbeciw? Rhowch gynnig ar ein cwis sy’n hwyl, i gael gwybod yr ateb