Blas ar bêl-droed...

Fel mae tîm Cymru’n gwybod, mae egni yn rhan bwysig iawn o hyfforddi gan nad wyt ti'n gallu hyfforddi’n ddwys os nad oes gen ti ddigon o egni yn dy gorff. Os nad wyt ti'n bwyta'n iawn, ni fydd dy ffitrwydd yn gwella o gwbl.

Y maetholion allweddol o’ch deiet sy’n rhoi egni i chi yw braster, protein a charbohydrad. Carbohydrad yw’r prif danwydd y byddwch yn ei ddefnyddio wrth hyfforddi ac mewn gemau, ac mae angen i chi gael llawer o’r maetholyn hwn yn eich deiet.

Mae bwydydd sy’n cynnwys llawer o garbohydrad yn cynnwys bara, tatws, pasta, reis a grawnfwydydd. Mae carbohydrad yn cael ei storio fel glycogen yn eich cyhyrau a’ch iau, ac fel glwcos yn eich gwaed.

Fodd bynnag, cyflenwad cyfyngedig yn unig o garbohydrad sydd gan eich corff, felly mae’n hanfodol eich bod yn cael carbohydradau ar ôl pob sesiwn hyfforddi a gêm.

Mae’ch cyhyrau’n parhau i fod yn actif am awr ar ôl sesiwn hyfforddi neu gêm a bydd yr egni a ddefnyddir gennych wrth hyfforddi neu mewn gêm yn cael ei ailgyflenwi a’i storio’n gyflymach yn eich corff.

Yn ystod y cyfnod hwn, dylech geisio yfed 1 litr o hylif a bwyta o leiaf un o’r bwydydd carbohydrad canlynol:

• dwy dafell o dost, cramwythen, bagel neu fyffin gyda jam
• powlen o rawnfwyd gyda llaeth hanner sgim
• 2 fanana
• bar grawnfwyd

Dylech fwyta pryd uchel mewn carbohydradau cyn gynted â phosibl ar ôl hyn er mwyn ailgyflenwi’r egni dros ben a’r maetholion y mae’ch corff wedi’u colli.

Dyma ddau gynllun bwydlen y dylech roi cynnig arnynt yn ystod diwrnod hyfforddi neu gêm arferol.

Canllaw yn unig yw’r amseroedd a roddir, bydd angen i chi addasu’r rhain ar gyfer eich amserlen eich hun, ond cofiwch fwyta’ch byrbryd carbohydrad a pheint o hylif o fewn awr i orffen hyfforddi. Cofiwch hefyd fwyta pryd 3 awr cyn gêm.

Diwrnod Hyfforddi Arferol
9.30/10am	Powlen o rawnfwyd brecwast Orennau mandarin Gwydraid o sudd oren ffres 1 tafell o dost
11.30am	Banana neu myffin wedi’i dostio gyda jam Peint o sudd ffrwythau neu sgwosh ffrwythau gyda dŵr
1pm	Taten drwy'i chroen gyda chorgimychiaid a chaws (e.e. caws colfran) Peint o sudd ffrwythau neu sgwosh ffrwythau gyda dŵr
3pm	2 fanana Llond llaw o rawnwin Peint o sudd ffrwythau neu sgwosh ffrwythau gyda dŵr
5pm	Pasta gyda chyw iâr, brocoli a saws tomato Iogwrt braster isel Peint o sudd ffrwythau neu sgwosh ffrwythau gyda dŵr
7pm	Powlen o rawnfwyd brecwast neu fanana a phaced o resins Gwydraid o ddŵr
8.30-10pm	Hyfforddi
10.30/11pm	2 dafell o dost a jam Grawnfwyd a ffrwyth Peint o sudd ffrwythau neu sgwosh ffrwythau gyda dŵr

Diwrnod Gêm Arferol (dechrau am 2pm)
9.30/10am	Peint o ddŵr Grawnfwyd a ffrwyth
11am	2 dafell o dost ac wyau wedi’u sgramblo, tomatos Sudd oren ffres
1pm	Diod chwaraeon Banana
Hyd at y gêm	Diod chwaraeon
Hanner amser	Diod chwaraeon
Ar ôl y gêm	Diod chwaraeon Banana neu far grawnfwyd
5/6pm	Cawl a bara Cyw iâr, pasta, llysiau mewn saws barbiciw Bananas a chwstard Peint o ddiod ffrwythau neu sudd ffrwythau gwan
8pm	2 dafell o dost a jam Peint o ddiod ffrwythau neu sudd ffrwythau gwan