Be sy’n bwysau iach?

Daw pobl mewn pob lliw a llun a byddan nhw'n tyfu ar wahanol gyfraddau, felly nid oes unrhyw bwysau iach penodol i anelu amdano. A gall fod yn beth eithaf arferol i ddau o bobl sydd yr un taldra fod â phwysau gwahanol.

Ond os ydych chi'n poeni’ch bod chi o bosib yn rhy drwm neu'n rhy ysgafn, ewch i weld eich meddyg teulu. Bydd yn gallu dweud trwy wirio'ch taldra a'ch oed, a thrwy edrych ar siâp eich corff, a oes angen ichi wneud rhywbeth yn ei gylch. Gall eich atgyfeirio at ddeietegydd os bydd yn meddwl bod angen mwy o gyngor arnoch chi.

Os ydych chi am gadw'ch pwysau ar lefel iach, fe ddylech chi ddilyn deiet cytbwys, iach, a chadw'n gorfforol actif.

Mae bod â deiet cytbwys, iach yn golygu y dylech chi:

• fwyta digonedd o ffrwythau a llysiau, o leiaf 5 dogn o ryw fath bob dydd
• seilio'ch prydau ar fwydydd â startsh, fel tatws, reis brown a bara gwenith cyflawn
• bwyta meintiau cymedrol yn unig o gig, pysgod a ffynonellau eraill da o brotein
• cael rhai bwydydd llaeth, fel caws, llaeth ac iogwrt – dewiswch opsiynau â llai o fraster lle bynnag bo hynny'n bosib
• cadw llygad ar faint o halen rydych chi'n ei fwyta – y mwyaf y dylai unrhyw un dros 11 oed ei gael yw 6g y dydd (neu 2.5g o sodiwm)
• bod yn ofalus â byrbrydau a diodydd sydd â llawer o fraster neu lawer o siwgr, a pheidio â’u cael yn rhy aml

Os ydych chi'n rhuthro o gwmpas rhwng ysgol, gwneud eich gwaith cartref a gweld eich ffrindiau, mae'n demtasiwn mawr bachu bwydydd sy'n gyflym ac yn hawdd i'w bwyta, a allai olygu eu bod nhw’n llawn braster a siwgr.

Felly cliciwch yma i weld ein hadran Bwyd ar fynd i gael rhai syniadau ar gyfer byrbrydau iach y gallwch chi eu paratoi mewn munudau.

Yn ogystal â'r hyn rydych chi'n ei fwyta, mae bod yn actif yn un o'r pethau pwysicaf y gallwch chi ei wneud i'ch helpu i gadw ar bwysau iach.

Mae'n bur debyg eich bod chi'n treulio'r rhan fwyaf o'r diwrnod ar eich eistedd, felly mae'n bwysig eich bod chi'n symud pryd bynnag y gallwch chi bob dydd.

Bydd gweithgaredd rheolaidd yn eich helpu i edrych a theimlo'n well, felly beth am gerdded i'r ysgol (neu ddod oddi ar y bws arhosfan neu ddau yn gynnar), neu fe allech chi gerdded i dŷ'ch ffrind i'w weld am sgwrs.

Os nad ydych chi awydd mynd i'r gym, yna mae nofio, tenis bwrdd a phob math o chwaraeon yn ymarfer corff gwych. Y gamp yw dewis gweithgaredd rydych chi'n mwynhau ei wneud.

Beth am roi cynnig ar rywbeth sy'n fwy o hwyl o bosib, fel dawnsio, neu ddod â'ch ffrindiau at ei gilydd i ddilyn fideo ymarfer corff?

Dolenni allanol

Nid yw'r ASB yn gyfrifol am gynnwys gwefannau allanol